اطلاعات روز: د پکتیکا په برمل او ګیان او د خوست په سپېرې ولسوالیو کې د زلزلې له امله زیانمن شویو خلکو ته د کډوالو په چارو کې د ملګرو ملتونو عالي کمیشنرۍ په مالي لګښت ۷۰۰ کورونه تر جوړېدو وروسته خلکو ته د اوسېدو په موخه په واک کې ورکړل شول.
د دغې ادارې مسوولینو زیاته کړې چې ۳۱۰ کورونه یې د پکتیکا ولایت په برمل او پاتې نور د دغه ولایت په ګیان او د خوست په سپېرې ولسوالۍ کې تر جوړېدو وروسته ګټې اخیستنې ته سپارلي دي.
یادې ادارې ویلي، چې دوی په برمل، ګیان او سپرې ولسوالیو کې په نورو رغنیزو چارو هم کار پیل کړی چې په بشپړېدو به یې د زلزله ځپلو خلکو شته اړتیاوې تر ډېره ورسره پوره شي.
په همدې حال کې بیا د پکتیکا ولایت د برمل ولسوالۍ اوسېدونکي په جوړ شویو کورونو خوښ دي او د خلکو اقتصادي ستونزو ته په کتو غوښتنه کوي، چې دوی ته دې په سیمه کې د پاکو اوبو، روغتیايي خدمتونو او پوهنې برخه کې هم ځانګړې پاملرنه وشي.
له دې وړاندې په برمل او ګیان ولسوالۍ کې د IRC موسېسې او د کرکټ د ملي لوبغاړي راشد خان په مالي ملاتړ تر ۱۰۰ ډېر کورونه جوړ او خلکو ته د اوسېدو لپاره ورسپارل شوي دي.
