اطلاعات روز: د ژغورنې نړیوالې کمیټې په بشري ناورین کې د ښکیلو ۲۰ هیوادونو نوملړ خپور کړی چې سومالیا، ایتوپیا او افغانستان په ترتیب سره په سر کې راغلي دي.
د دې کميټې په وينا، د دې نوملړ ۱۰ لومړني هيوادونه ښايي راتلونکی ميلادي کال (۲۰۲۳) له بدترين بشري ناورین سره مخ شي.
د ژغورنې نړيوالې کميټې په راپور کې چې نن (چهارشنبه، ۲۳ د لیندۍ) خپور شو، راغلي چې د ۲۰۲۲ کال د ارزونې په نوملړ کې افغانستان لومړنی و، خو په ۲۰۲۳ کال کې درېيمې درجې ته راغلی. «دليل يې دا نه دی چې حالات ښه شوي بلکې له دې کبله چې په ختيځه افريقا کې حالات ډېر زيات خراب شوي دي.»
دې کميټې زیاته کړې، چې د قدرت تر بدلون يو کال وروسته هم افغانان د اقتصاد د پاشل کېدو له خطر سره مخ دي.
د ژغورنې کميټې ويلي، چې په تېر ژمي کې د مرستو زياتوالي د قحطۍ مخه ونيوله، خو د دې ناورین اصلي علت لا هم پر ځای پاتې دی.
د دې کميټې په وينا، د طالبانو حکومت د اقتصاد په ښه کولو کې غفلت کړی دی.
د ژغورنې د نړيوالې کميټې په راپور کې راغلي چې تقريبا د افغانستان ټول نفوس اوس مهال له فقر سره مخ دی او د يوه بل اوږد ژمي لپاره تيارېږي.
د دې کميټې په وينا، افغان ښځې او نجونې به په دې لړ کې نورې هم له ستونزو سره مخ شي او اوس هم د تاوتريخوالي او استثمار له خطر سره مخ دي.
