اطلاعات روز: د کندهار په صنعتي پارک کې د ۵۵ ميليونه افغانیو په ارزښت د پنبې د پروسېس او غوړيو د تولید یوې فابريکې په فعاليت پېل وکړ.
د دغه فابریکې مسوول حاجي حبيب الله حبيب يار وايي، په هرو دولسو ساعتونو کې ۳۲ ټنه پنبه پروسېس کوي او شاوخوا ۱۲.۵ ټنه غوړي توليدوي.
نوموړی زياتوي، چې په دغه کارخونه کې ورسره نږدې پنځوس تنه په مستقيمه او اتیا کسه په غیر مستقيمه توکه په کار بوخت دي.
د ده په وينا، چې ترټولو لويه ستونزه يې د برق نشتون دی او که د طالبانو حکومت يې د بریښنا ستونزه حل کړي نو لا زياته پانګونه به وکړي.
حبيب يار وویل: « موږ په هرو ۱۲ ساعتونو کې ۳۲ ټنه پنبه پروسېس کوو، شاوخوا ۱۲.۵ ټنه غوړي توليدوو، ۲۰ ټنه کُنجاره او د ۲.۵ ټنو صابون تولید لرو.»
دغه راز کندهار کې د معدن او صنايعو خونې مرستيال حاجي يار محمد رحماني وایي، کندهار کې شاوخوا ۲۵۰ فابريکې شتون لري چې له هغې جملې اوس مهال يوازې ۱۲۰ فعاليت کوي او پاتې نورې یې د برېښنا نشتون او مختلفو لاملونو له امله تړل شوي دي.
نموړی زیاتوي، کندهار کې اوس مهال د پنبې د پروسېس او غوړيو د تولید ۲۷ فابريکې فعاليت لري چې د ورځې په جریان کې نږدې ۵ ټنه پنبه او د پنبه دانې څخه غوړي توليدوي.
