اطلاعات روز: د خوست ولایت په موسی خېلو ولسوالۍ کې یوه خیریه بنسټ د خلکو په شخصي لګښت د یوه لوی پُل د جوړېدو چارې پېل کړې.
په دغه ولایت کې ځايي خلک وايي، د موسی خېلو او قلندر ولسوالیو ترمنځ د غځېدلې لارې په مسیر د «غلنګ» پُل رغونې کارونه په داسې مهال پیل شول، چې له تېرو څو کلونو راهیسې خلک د تګ راتګ پرمهال له ګڼو ستونزو سره مخ وو.
دوی زیاتوي، یاد پُل چې ۳۰ متره اوږدوالی او ۸ متره سور لري د سیمې د اوسېدونکو له خوا د جوړ شوي حق خیریه بنسټ په مالي ملاتړ پرې ۲۷ میلیونه افغانۍ لګښت راځي، چې د رغونې کار به یې د یو کال په موده کې بشپړ شي.
د موسی خېلو ولسوالۍ اوسېدونکي وايي، د اورښتونو او سېلابونو پر مهال د غلنګ په سیمه کې له ګڼو ستونزو سره مخ وي او ډېر کله ناروغان روغتون ته له رسېدو مخکې ساه ورکوي.
د دوی په وینا چې د دغه پُل په جوړېدو سره به یې شته ستونزې تر ډېره هوارې او وبه کولی شي، چې په لنډه موده کې ځان د خوست مرکز ته ورسوي.
د موسی خېلو ولسوالۍ اوسېدونکو همدا راز د خوست ولایت لپاره د طالبانو په ولایتي مسوولینو نیوکه وکړه، چې د بیارغونې پروژو برخه کې یې له پامه غورځولي دي.
په موسی خېلو ولسوالۍ کې د غلنګ پُل په داسې مهال د خلکو په شخصي مصارفو رغول کیږي، چې په دغه ولایت کې د ګڼو نورو ولسوالیو نښلوونکي پُلونه د تېرو سېلابونو پر مهال ویجاړ شوي او لا یې هم د بیا رغونې لپاره عملي اقدام نه شوی.
