اطلاعات روز: د افغان ښځو، نجونو او بشري حقونو لپاره د امریکا ځانګړې استازې رینا امیري وايي، د ښځو او نجونو پر وړاندې د طالبانو تګلارې به افغانستان په یوه افراطي هېواد بدل کړي.
اغلې امیري تېره شپه (شنبه، ۲۱ د لړم) په یوه ټویټ کې لیکلي چې هغه کسان چې له یو افراطي افغانستان څخه وېره لري باید د طالبانو له سیاستونو په اړه اندېښمن وي.
نموړې لیکلي: «هغه کسان چې له یوه افراطي افغانستان څخه ویره لري، باید د ښځو او نجونو په وړاندې د طالبانو د تګلارو په اړه اندیښمن وي، لکه د زده کړو څخه محرومیت، په ډیرو سکتورونو کې د کار کولو منع کول او حتا په کوچنیو مسایلو لکه تفریحی پارکونو ته د ښځو نه پریښودل.»
هغې زیاته کړې، چې د طالبانو افراطیت به په افغانستان کې د بې ثباتۍ، بې وزلۍ او د زیاتو خلکو د تېښتې لامل شي.
طالبانو د تازه محدودیتونو په لړ کې د پلازمینې کابل په ګډون په یو شمیر ولایتونو کې ښځې له تفریحي پارکونو، سپورټي کلبونو او عمومي حمامونو ته له تګ منع کړې دي.
د دغه بندیز تازه اعلامیه د فاریاب په مرکز میمنې ښار کې خپره شوې ده.
په دغه اعلامیه کې دا هم ویل شوي چې ښځې نشي کولای له محرم پرته رسټورانټونو ته ولاړې شي.
طالبانو په دولتي ادارو کې ښځې له کار کولو او له شپږم ټولګي پورته نجونې له ښوونځیو منع کړې دي.
