اطلاعات روز: ننګرهار کې د طالبانو د کرنې ریاست مسوولین وایي، د دې ولایت په حصارک، شېرزاد، خوګیاڼي، پیچراګام، هسکه مېنه، کوټ، اچین او سپين غر ولسوالیو کې جلغوزي حاصل ته رسیدلي او د راټولولو لړۍ یې روانه ده.
د یاد ریاست لپاره د طالبانو د جلغوزیو برخې مسول عيسی جان عتیق ابدیاني وایي، تر اوسه له یادو ولسوالیو ۱۱۵۵ ټنه د جلغوزیو غوزې یا غوټX راټولې شوي، چې د اټکل له مخې ۱۱۵ ټنه خالص جلغوزې کېږي او په وینا یې د راټولولو چارې لا روانې دي.
نوموړی وایي، د تېر په پرتله ځنګلزاره سیمو ته د طالبانو د حکومت پاملرنه ډېره شوې او تمه لري، چې د جلغوزیو حاصل به تر پخوا لوړ وي.
ابدیاني زیاته کړه:«د ننګرهار په اته ولسوالیو کې زموږ د جلغوزیو ځنګلونه موجودي او اوسمهال یې د راټولو چارې پیل شوي، چې تر اوسه د ننګرهار اته ولسوالیو کې ۱۱۵۵ ټنه غوزې راټولې شوي، چې د دې له جملې ۱۱۵ ټنه خالص جلغوزې دي چې هغه د استفادې وړ دي او له ځنګلونو د غوزو یا غوټو د راټولو لړۍ لا هم روانه ده نو تمه شته چې حاصلات به یې سږکال زیات وي.»
خو بلخوا د جلغوزیو کاروباریان چې د تیر په پرتله په دغه ولایت بې وخته بارانونو او سیلابونو دجغلوزیو پر حاصلاتو یو څه بده اغیزه کړی ده، خو زیاتوي چې د ننګرهار جلغوزیو حاصل د کیفیت له مخې ښه دي او تمه لري، چې په لوړه کچه جلغوزې په راټول کړي.
میرویس په ننګرهار د جلغوزیو کاروبار کوي هغه د طالبانو له حکومت صادراتو ته د نړیوالو بازارونو د پیدا کیدو او د جلغوزیو د سوداګرۍ په برخه کې د اسانتیاو د برابریدو غوښتنه کوي.
له غوزو یا غوټو څخه د جلغوزې د دانو ویستلو د لومړي پروسېس برخه تر ډېره ننګرهار کې کېږي، چې لسګونه کسانو ته پکې کاري زمینه برابر شوې، او له دې لارې یوه اندازه عواید تر لاسه کوي.
د جلغوزیو په برخه کې په کار بوخت عمر خان له حکومت د جلغوزیو د پروسېس لپاره د لویو فابریکو د جوړیدو غوښتنه کوي، چې د اقتصادي حالت د ښه والي تر څنګ به ګڼو کسانو ته پکې د کار زمینه هم برابر شي.
عمرخان زیاتوي:«د جلغوزیو له برکته دلته سلګونه کسانو ته یوازې په ننګرهار کې دکار زمینه برابره شوې او له همدې لارې دکورنۍ نفقه برابروي، د جلغوزیو دا غوټې له شېزرادو ولسوالۍ راغلي موږ دلته راځو د پاک کارۍ په برخه کې فعالیت کوو او خپله ورځ تېرو او یو مړۍ حلال رزق پیدا کوو؛ خو له حکومت غواړو چې موږ ته په نورو برخو کې هم د کار زمینه برابره کړي.»
د سوداګرۍ وزارت دمعلوماتو له مخې چې د روان کال په شپږو میاشتو کې یې د ۱۹ میلیونه افغانیو په ارزښت جلغوزي بهرنیو هیوادونو ته صادر کړي دي.
