اطلاعات روز: بدخشان کې ځایي سرچینې وايي، طالبانو د دغه ولایت په راغستان ولسوالۍ کې د «مقاومت جبهې» ۱۲ غړي له نیولو وروسته په ډزو وژلي دي. سرچینې ادعا کوي، چې په دغو کسانو کې يو ١٤ کلن ماشوم هم شامل دى.
د سرچينې د معلوماتو له مخې، دغه ١٢ کسان د تيرې اونۍ پنجشنبې په ورځ (۵ د لړم) په ډزو وژل شوي دي.
یوې سرچینې اطلاعات روز سره په خبرو کې څرګنده کړه، چې د «مقاومت جبهې» یوه ۱۷ کسیزه ډله وروسته له هغه د خواهان ولسوالۍ په «چُسنکیل» سیمه کې ونیول شوه کله چې د جلال الدین خراساني او عبدالبصیر په نومونو د دوی دوه قومندانان ووژل شول او دوی راغستان ولسوالۍ ته انتقال شول.
دغې سرچینې ادعا وکړه، چې طالبانو په راغستان ولسوالۍ کې د «مقاومت جبهې» غړي په دوو ډلو وېشلي دي، چې ۱۲ یې په ډزو ویشتلي او مثله کړي مګر، پنځه نور یې ژوندي فیض اباد ته انتقال کړي دي.
یوې بلې سرچینې بیا وویل، چې طالبانو د «مقاومت جبهې» ځواکونه تر وژل کیدو وروسته د هغوی جسدونه د سرو زرو په یوې معدني ویجاړې څاه کې غورځولي چې د اوبو او خټو ډکه وه.
د سرچينې په وینا، سره له دې چې د «مقاومت جبهې» د غړو له وژل کېدو يوه اوونۍ تېرېږي، خو طالبانو د هغوى خپلوانو ته اجازه نه ده ورکړې، چې مړي له څاه راوباسي او ښخ یې کړي.
سرچينې اطلاعات روز ته زیاته کړه، چې په وژل شويو کسانو کې د جلال الدين خراساني د زوی هلال الدين په نوم يو ١٤ کلن ماشوم هم شامل دی، چې تر پوښتنو ګروېږنو وروسته وژل شوى دى.
د خواهان ولسوالۍ لپاره د طالبانو ولسوال مولوي ضياءالدين د «مقاومت جبهې» د لسو غړو وژل کېدل تاييدوي. خو وایي، معلومه نه ده چې دغه کسان څنګه وژل شوي دي.
هغه دا هم مني چې د طالبانو وژل شوي کسان په څاه کې اچولي دي.
طالبان تر دې وړاندې هم په بدخشان او پنجشیر کې د بندیانو په وژلو تورن شوي دي.
د پنجشیر ترڅنګ بدخشان یو له هغو ولایتونو څخه دی چې طالبان پکې له خپلو وسله والو مخالفینو سره په جګړو اخته دي.
