اطلاعات روز: د هزاره ګانو د «نسل وژنې» مخنیوي په موخه د لاریونونو پر دوام، افغان اتباع په هالنډ کې د جرمونو نړیوالې محکمې (هاګ) مخې ته راټول شوي دي.
دوی «د هزاره ګانو نسل وژنه بنده کړئ» او «هزاره اوسیدل جرم نه دی» شعارونو په لاس نیول سره، پر کاج ښوونیز مرکز د وروستي برید په ګډون پر هزاره ګانو د شویو بریدونو قربانیانو لپاره د عدالت غوښتونکي شول.
دغه راز لاریون کوونکو د کاج ښوونیز مرکز د قربانیانو په یاد کې شمعې بلې کړې. په دغه برید کې نږدې ۶۰ زده کوونکي، چې ډېری یې نجونې وې، ووژل شوې.
پر کاج ښوونیز مرکز برید په نړیواله کچه اعتراضونه راپارولي دي.
د هاګ د محکمې مخې ته يوه لاريون کوونکي وويل، څه باندې سل کاله کېږي چې افغان هزاره ګان د خپل قومي هويت له امله قرباني کېږي.
هغه وايي، چې افغان هزاره ګان په جوماتونو، مدرسو، ښوونځيو او د لوبو په ميدانونو کې وژل کېږي. د دغه مظاهره کوونکي په وینا، د قربانیانو جرم «هزاره اوسیدل» دي.
لاریون کوونکي له ملګرو ملتونو او د جرمونو له نړیوالې محکمې غواړي، چې د هزاره ګانو «نسل وژنه» بنده او په رسمیت یې وپېژني.
د شنبې ورځ (۱۶ د تلې) راهیسې چې د اکتوبر له اتمې نیټې سره برابره ده، د نړۍ په لسګونو هیوادونو او ښارونو کې د هزاره ګانو د «نسل وژنې» د دوام مخینوي په موخه لاریونونه ترسره شول.
دغه لاريونونه په ځينو هېوادونو کې لا هم دوام لري. د «هزاره ګانو نسل وژنه بنده کړئ» د دې لاریونونو اصلي شعار و.
