اطلاعات روز: ننګرهار کې ځایي سرچینې وایي، د دې ولایت په ښېوې ولسوالۍ کې یوه میرمن او هلک د نامشروع اړیکو درلودلو په تور وژل شوي دي.
د ننګرهار د کوز کونړ یا ښېوې ولسوالۍ ځایي اوسیدونکي غلام محمد اطلاعات روز ورځپاڼې ته وویل، چې تیره ورځ (دوشنبه، ۲۱ د وږي) د دې ولسوالۍ په مربوطاتو کې یوه میرمن او هلک ځایي خلکو د نامشروع اړیکو پرمهال نیولي او بیا یې ځایي طالب چارواکو ته سپارلي دي.
نوموړی زیاتوي، ځایي چارواکو د جوړ جاړي له مخې میرمن او هلک په يوه موټر کې له يوه امنيتي کس سره دره نور ولسوالۍ ته ليږل، چې هلته د ميرمنې د کورنۍ غړي د ښېوې ولسوالۍ اړوند په« سورچ کلي» کې ورته مخې ته راوتلي او دواړه يې په ډزو وژلي دي.
د ده په خبره، هغه امنيتي کس چې دوی یې ليږدول هغه بيا له پېښې وروسته طالبانو نیولی دی.
دی وایي، وژل شوي هلک او میرمن دواړه د دره نور ولسوالۍ اوسیدونکي وو او همدارنګه وژل شوې میرمن دوه اولادونه هم درلودل.
هڅه مو وکړه د یادې پېښې په اړه د ننګرهار د امنیې قومندانۍ د چارواکو نظر هم ولرو، خو بریالي نشو.
په دې وروستیو کې د ننګرهار په لېرې پرتو سیمو کې دا ډول ناموسي وژنې زیاتې شوي چې لامل یې کورنی تاوتریخوالی او بې سوادي بلل کیږي.
