اطلاعات روز: پنجشیر ولایت کې باوري سرچینې وايي، چې طالبانو د «مقاومت جبهې» اته اسیران په ډزو ویشتلي دي.
یاده پېښه د دوشنبې شپه (۲۱ د وږي) د پنجشېر په دره ولسوالۍ کې رامنځته شوې ده.
لږ تر لږه دوه ځایي سرچينې وايي، چې په وژل شويو کسانو کې د يارمحمد په نوم د «مقاومت جبهې» قومندان او د هغه دوه ځوان زامن هم شامل دي.
يوې سرچينې اطلاعات روز ته وويل، دغه کسان د پنجشېر خنج ولسوالۍ د شابه قرارګاه پورې مربوط وو، چې دوه ورځې وړاندې پېشغور قرارګاه کې د مېشتو سرتېرو مرستې ته تللي وو.
د سرچينې د معلوماتو له مخې، قومندان يارمحمد او ملګري يې شابه قرارګاه ته بیرته تګ پرمهال د «چشمه آب» سیمه کې پېشغور قرارګاه نه نږدۍ د طالبانو له کمین سره مخ او اسیر شوی وو.
سرچینه زیاتوي، چې طالبانو نیول شوي کسان دره ولسوالۍ ته بیولي او بیا یې په ډزو وژلي دي.
په هغو دوو ویډیويي کلیپونو کې چې سرچینې اطلاعات روز ته لېږلي، لیدل کېږي چې طالبانو د «مقاومت جبهې» اسیرانو لاسونه شاته تړلي دي.
طالبانو او د «مقاومت جبهې» تر اوسه په دې اړه په رسمي ډول څه نه دي ویلي.
د کابل په شمال کې د پنجشیر ولایت له تېر یوه کال راهیسې د طالبانو او «مقاومت جبهې» ترمنځ د جګړو شاهد دی. طالبانو تر دې وړاندې هم په دغه ولایت کې د «مقاومت جبهې» له اسیرانو څخه سرونه پرې کړي وو.
په وروستیو ورځو کې د پنجشیر ولایت ځینې برخې د طالبانو او «مقاومت جبهې» ترمنځ د نښتو شاهدې دي. د «مقاومت جبهې» ادعا کړې چې په دغو نښتو کې طالبانو ته درنه مرګ ژوبله اوښتې ده.
