اطلاعات روز: وروستیو سیلابونو د کندهار سپین بولدک ولسوالۍ کې د یوې ښځې ژوند اخیستی او د کندهار ښار او سپین بولدک ولسوالۍ ترمنځ لار یې په مکمل ډول بنده کړې ده.
د کندهار سپين بولدک ولسوالۍ کې یوه ځایي طالب چارواکی چې نه غواړي نوم يې یاد شي اطلاعات روز ته وويل، د تېرې ورځې (جمعه، ۴ د وږي) سېلابونو له امله يوې ښځې خپل ژوند له لاسه ورکړی او خاوند یې ټپي دی.
د هغه په خبره: «د سېلابونو اوبو د دغې ښځې کور نړولی ښځه او خاوند یې ډوب کړي وروسته يې موږ خاوند ژوندی پيدا کړ او د ښځې مړی مو د زاړه ماندې سره وموند.»
دغه راز د سپين بولدک ولسوالۍ يوه اوسېدونکي سميع الله اطلاعات روز ته وویل، چې له تېرو دوو ورځو راهیسې د کندهار ښار او سپین بولدک ولسوالۍ ترمنځ لار د خلکو د تګ-راتګ پرمخ تړل شوې ده.
سميع الله وايي، د سېلابونو راوتو له کبله خلکو ته درانه مالي زيانونه اوښتي او د ډېرو کسانو کورونه نړېدلي دي.
د سميع الله په وينا: «نن دوهمه ورځ ده چې د سپين بولدک ولسوالۍ او کندهار ښار ترمنځ لار د مسافرو پر مخ بنده ده، ډېرې اوبه راغلي او د خلکو کورونه يې نړولي، د طالبانو امنيتي کسانو ډېر خلک د سېلابونو له اوبو څخه را ايستلي دي.»
وروستیو ورښتونو او سیلابونو د هیواد ګڼو سیمو کې خلکو ته مالي او ځانی زیانونه اړولي دي.
