اطلاعات روز: د هیواد د خپلواکۍ ۱۰۳مې کلیزې د لمانځنې په مناسبت پکتیا کې په جوړه شوې غونډه کې د پکتیا ولایت لپاره د طالبانو د والي مرستیال «عزیز الرحمان منصور» ویلي، چې غازي امان الله خان قهرمان نه و؛ یو دروغجن شخص و، او له انګریزانو یې د خپلواکۍ په اخیستلو کې هیڅ رول نه دی لوبولی.
نوموړي پرون جمعه (۲۸ د زمري) د خپلواکۍ په مناسبت جوړه شوې غونډه کې زیاته کړې، چې کابو ۱۰۳ کاله وړاندې د هیواد د خپلواکۍ په اخیستلو کې امان الله خان نه بلکې افغان ولس مهم رول لوبولی دی.
نوموړی وايي: «که تاسو د امان الله خان فرامین وګورئ، نو درته معلومیږي، چې ناخوالې له هماغه ځایه شروع شوې دي او له انګریزانو یې هغه خپلواکي نه دی اخیستې او نه ورته قهرمان ویلی شو، بلکې په دې خپلواکۍ کې ولس قرباني ورکړې ده. هلته مونږ لاهم خپلواک نه و، که انګریزان شړل شوي و، خو فکر او فرمانونه یې لاهم چلیدل او افغانستان د اقتصاد له اړخه اشغال و.»
عزیز الرحمان منصور همدا راز واک ته د طالبانو رسیدو ته په اشارې سره وویل، چې د امریکايي ځواکونو او ۱۰۳ کاله وړاندې د خپلواکۍ ترمنځ ډېر توپیر موجود دی، د هغه په خبره چې په هماغه وخت کې یوازې انګریزان شړل شوي و، خو خلکو لاهم فکري او اقتصادي ازادي نه درلوده.
د نوموړي په وینا اوس چې امریکا په هیواد کې ماتې خوړلې، نو هیواد په بشپړه توګه له هر اړخه ازاد شوی دی.
هغه وویل: «امان الله خان یو دروغجن شخص و او هغه ته هیڅکله د غازي لقب استعمالول نه دي پکار، که ۱۰۳ کاله وړاندې انګریزانو ماتې وخوړه، خو له دې ازادۍ سره ډېر توپیر لري، چې اوس مهال مونږ له امریکایانو اخیستې، ځکه اوس خلک له هر لحاظ په امن او ازاد ډول ژوند کوي.»
د والي د مرستیال د خبرو په غبرګون کې بیا ځینې خلک وايي، چې امان الله خان نه یوازې د خپلواکۍ اخیستلو برخه کې قرباني ورکړې، بلکې تمه یې درلوده، چې دغه هیواد په ټوله مانا د نړۍ له نورو هیوادونو سره سیال کړي.
په دې اړه د پکتیا ولایت یو تن اوسېدونکي چې نه یې غوښتل نوم یې څرګند شي، وویل افغانان په دې پوه شوي چې غازي امان الله خان د هیواد لپاره نه ستړې کېدونکې هلې ځلې کړې دي.
نوموړي په طالبانو د نیوکې په ډول دا هم وویل، چې خلکو ته یې اجازه نه ده ورکړې، چې په ازاد فکر او شانداره مراسمو سره دغه ورځ ولمانځي.
د یادونې وړ ده، چې په پکتیا، پکتیکا او خوست ولایتونو کې د طالبانو له خوا د خپلواکۍ ورځې د لمانځنې په مراسمو کې ملي بیرغ ته د نه اجازې له امله په جوړو شویو مراسمو کې په کم تعداد یوازې د طالبانو نظامي کسانو ګډون کړی و.
