اطلاعات روز: ننګرهار کې د ځغاستې فدراسیون مسوولین وایي، په دې ولایت کې د ۱۶۰ ماشومانو ترمنځ د منډې وهلو سیالۍ ترسره شوه.
د دغه ولایت د ځغاستې فدراسیون مشر شکرالله پهلوان وایي، په دې سیالیو کې ۱۶۰ ماشومانو برخه اخیستې وه، چې په څلورو کټګوریو کې یادې سیالۍ ترسره شوې.
نوموړی وایي، د دې سیالیو موخه ورزش ته د ماشومانو هڅول او د دوی ترمنځ د غوره استعدادونو په نښه کول وو.
شکرالله پهلوان زیاته کړه:« ننګرهار کې د منډې وهلو په سیالۍ کې ۱۶۰ ماشومانو برخه اخیستې وه او همدارنګه په راتلونکې کې هم پلان لرو؛ چې دا ډول سیالۍ ترسره کړو هم د ځوانانو او هم د ماشومانو لپاره څو وکولای شو له دې لارې د هیواد په کچه د ځغاستې په برخه کې اتلان ولرو.»
عمر هغه لوبغاړی دی چې په یادو سیالیو کې یې برخه اخیستې ده.
که څه هم دا کوچني ماشومان لا د دې سیالیو په ارزښت نه دي خبر خو خوښ دي، چې په لویه کچه ورته د منډو وهلو زمینه برابره شوې.
عمر زیاته کړه: «مونږ ډیر خوشاله یو چې راته دا ډول سیالۍ برابره شوې وه، مونږ لا هڅه کوو چې په راتلوونکې کې ورزش وکړو او اتلان شو.»
پرواز او کاکړ دوه هغه پلرونه دي د خپلو ماشومانو د هڅونې لپاره د سیالیو نندارې ته راغلي او هر یو یې د خپل بچي د بریا دعاوې کوي.
دوی وایي، دا ډول سیالۍ د ماشومانو په ذهني وده ډېره مثبته اغېزه لرلی شي.
دوی وویل: «دا ډول سیالۍ برابرول ډیرې ښې دي ځکه دا د ماشومان په ذهن مثبت اغیز کوي او همدارنګه د ټولنې نور ماشومان او خلک چې دوی ګوري هغوی هم ورزش ته هڅیږي، نو له نورو ورزشي ادارو هم غوښتنه کوو؛ چې په راتلوونکې کې دې د ماشومانو ورزش ته د هڅونې دا ډول لوبې برابرې کړي.»
کلونه وروسته دا لومړی ځل دی، چې په ننګرهار کې د کوچنیو ماشومانو ترمنځ د ځغاستې یا منډې وهلو سیالي په لاره اچول کېږي.
لوبغاړي هیله مندي ښيي چې تر دې وروسته به د زون او بیا د هېواد په کچه په لویو سیالیو کې برخه واخلي.
