اطلاعات روز: زابل ولايت کې عام وګړي او هټيوال وايي، سختو توپاني بادونو ورته مالي زيانونه اړولي دي.
د زابل اوسېدونکي وایي، د تېري ورځې توپاني بادونو يې د نورو تاوانونو ترڅنګ د سولرېزې برېښنا هندارې ماتې کړي.
د دوی په وینا: «باد دومره تېز و موږ ویل چې له ځانه سره یوړو، سرعت يې بېخي ډېر او تېز و، د سولرېزي برېښنا هندارې يې راته ماتې کړې او موږ ته یې ډیر مالي زیانونه واړول.»
همدارنګه زابل کې هټيوال وايي، سږکال یې د سختو بادونو، تندې ګرمۍ او وچکالۍ له کبله ډېر تاوانونه کړي دي.
دغه هټيوالو زياته کړه، چې د شديدو بادونو له امله یې لوحې ماتې شوي او د برېښنا د تولید سولرېزې هندارې يې پر ځمکه را لوېدلي دي.
د یادونې وړ ده چې د زابل مرکز او ولسوالیو ترڅنګ د کندهار په ځینو سیمو کې هم توپاني بادونو د خلکو ورځنۍ چارې ټکنۍ کړي او مالي زیانونه یې اړولي دي.
