اطلاعات روز: د سرپل په بلخاب ولسوالۍ کې سیمه ییزې سرچینې وايي، طالبانو د یو شمېر بې ځایه شویو کسانو موټر او موټرسایکلونه «غنیمت» کړي دي.
بلخاب کې د طالبانو او مولوي مهدي مجاهد ترمنځ د څو ورځنۍ جګړو له امله سلګونه کورنۍ بې ځایه شوي دي.
زياتره بې ځايه شوي د «گلورز»، «دوشاخ»، «استوان»، «جرم»، «گوخ»، «جه»، «زو»، «سرخک بلاق» او «للندر» کلیو اوسېدونکي دي. د سرچينې د معلوماتو له مخې، اوسمهال په يادو کليو کې طالبان ځای پرځای شوي دي.
په بلخاب کې يوې ځايي سرچينې د نوم نه ښودلو په شرط اطلاعات روز ته وويل، چې دغه بې ځایه شویو د تیښتې پر وخت خپل موټر او موټرسايکلونه د «للندر» او «سرخک بلاق» په کليو کې پریښي وو.
د سرچينې په وينا، طالبانو پر دغو دوو کليو بريد کړى او د خلکو ټول موټر يې غنیمت کړي دي.
په بلخاب کې طالبان د ملکي وګړو په وژلو او له بشري حقونو څخه په سرغړونې تورن شوي دي. خو دغه ډله په بلخاب کې د ملکي وګړو د ژوند او مال د زيان خبره ردوي.
په بلخاب کې سرچينې وايي، طالبانو د ځينو کليو اوسېدونکو ته خبرداری ورکړی، چې د شپې له خوا له خپلو کورونو بهر نه شي، شاید د لیزري وسلو ښکار شي.
له بلې خوا بیا سرچینه زیاتوي چې په سرپل کې د طالبانو د والي له لوري بې ځایه شویو کورنیو ته د ستنیدو ډاډ ورکول شوی خو، دوی د ویرې له امله ستنیدو ته چمتو نه دي.
په همدې حال کې سرچینې د کډوالو وضعیت کړکېچن بولي او وايي چې په بدو شرایطو کې درو او غرونو کې ژوند تیروي او عاجلو مرستو ته اړتیا لري. د سرچينې د معلوماتو له مخې، د بلخاب بې ځایه شویو ته د هیڅ مرستندویه ادارې مرسته نه ده رسیدلې.
