اطلاعات روز: د ارزګان ولايت په چهارچينو ولسوالۍ کې د شخصي دښمنۍ له امله درې تنه وژل شوي او درې نور ټپیان دي.
په ارزګان کې د طالبانو د امنيې قومندانۍ وياند اغاولي قريشي وايي، طالبانو تېره ورځ ( شنبه، ۲۱ د غبرګولي) په چهارچينو ولسوالۍ کې د هغه درې تنو جسدونه موندلي چې خپلو دښمانانو یې څو ورځې وړاندې له ځانه سره وړي وو.
قریشي زیاتوي دغه پيښه د چهارچينو ولسوالۍ په «تګاب» سيمه کې د دوو کورنیو ترمنځ د پخوانۍ دښمنۍ له امله رامنځته شوې او د يادې پيښې په تور ۱۵ کسان نيول شوي دي.
بلخوا يوه بله سرچينه بیا اطلاعات روز ته وویل، چې په یادې پیښه کې درې کسان وژل شوي او درې نور ټپیان دي.
د سرچینې په خبره چې د يادو جسدونو تر موندنې وروسته د وژل شویو کسانو خپلوانو د قاتل کسانو سره په جګړه اخته شوي او پرمهال يې د هغوئ درې کسان ټپیان کړي دي.
دغه سرچيني وويل چې د جګړي دکابو کولو لپاره د طالبانو کسان سيمې ته ورغلي او جګړه یې کابو کړې ده.
واک ته د طالبانو له رسيدو وروسته د هیواد په جنوبي حوزه کې خپل منځي شخړې او د پخوانیو دښمنیو غچ اخیستنې زور اخیستی چې طالبانو یې د مخنیوي لپاره تر دې دمه کوم اقدام نه دی کړی.
