اطلاعات روز: هلمند کې ځایي مسوولین وایي، په دې ولایت کې د دوو جلا ترافیکي پیښو له امله یوه ماشومه جلۍ مړه شوې او دوه تنه نور ټپیان شوي دي.
په دې ولایت کې د طالبانو د اطلاعات او فرهنګ ريیس حافظ راشد هلمندی وايي، دغه ترافیکي پیښې تېره ورځ (سې شنبه، ۱۷ د غبرګولي) په نادعلي ولسوالۍ کې رامنځته شوي دي.
دی وایي، لومړۍ ترافیکي پیښه د نادعلي ولسوالۍ «چاميرزا» سيمه کې رامنځته شوې چې یوه موټر د زیات سرعت له امله یوه کوچنۍ جلۍ وهلې او مړه کړې یې ده.
هلمندی زیاتوي، موټر چلوونکی جمعه ګل نومیږي چې د دوی لخوا نیول شوی او څیړنې ترې روانې دي.
ورته مهال بیا په یاده ولسوالۍ کې په یو بله ترافیکي پیښه کې د يوې رکشې او پاسو موټر د ټکر له امله دوه کسان ټپیان شوي دي.
حافظ راشد وايي، رکشه چلوونکی او ورور یې ټپیان شوي او د پاسو موټر چلوونکی د دوی لخوا د تحقيقاتو په موخه نيول شوی دی.
په هلمند کې په دې ورستيو کې ترافيکي پيښې زياتې شوي دي.
ددغه ولايت د طالبانو چاوراکو څو ورځې مخکې خبر ورکړی و چې د ترافيکي پيښو د کميدو په هدف يې خلکو ته بېلابېل د عامه پوهاوي پرګرامونه پر لاره اچولي دي.
