اطلاعات روز: کندهار کې د طالبانو ځايي مسوولين وايي، د UNHCR موسېسې په مالي ملاتړ یې د دې ولايت په ارغنداب ولسوالۍ کې د ۲۰ کيلو متره کانال په پاک کارۍ کې شاوخوا ۶۰۰ کسانو ته کاري زمینه برابره کړې ده.
د دغه ولايت ځايي مسوولينو په خبره، یاد کسان د کندهار د کرنې او کډوالو ریاستونو په همغږۍ او د ملګرو ملتونو د کډوالو ادارې په مالي ملاتړ پر کار ګمارل شوي دي.
د طالبانو مسوولين زياتوي چې په دې کار سره به له يوې خوا د ارغنداب ولسوالۍ دغه ۲۰ کيلو متره کانال پاک شي او له بلې خوا به د دې سیمې ۶۰۰ تنه هم په کار شي.
د مسوولینو په وينا دغه ۶۰۰ کاريګرو ته به د کانال د پاک کارۍ په بدل کې نغدې پيسې ورکول شي.
په همدې حال کې د دغې ولسوالۍ خلک وايي، د دغه کانال پاک کاري سره به یې د اوبو ستونزې حل شي او په اسانه به یې ترځمکو رسیږي.
دوی وويل، د دې کانال تر پاکېدو وروسته به يې کرل شويو فصلونو ته پر وخت د اړتيا وړ اوبه ورسېږي او تر يوه بريده به د وچکالۍ پر وړاندې هم اغېزناکه اوسي.
د کلي خلک له موسېساتو څخه غوښتنه کوي څو خلکو ته دوامداره کاري زمينه برابره کړي او د بېکارۍ مخه ونيسي.
د يادونې وړ ده چې په دې وروستيو کې د هېواد په مختلفو ولسواليو کې ډېر شمېر کسان بې کاره شوي چې ورسره يو وخت يې د هېواد پر روان وضعيت هم اغیزه کړې ده.
