د پکتیکا ولایت په مرکز او ولسوالیو کې ماشومانو ته د پولیو واکسین پیل شوی، چې د مسوولینو په خبره په روانو دریو ورځو کې به ۲۶۷۰۰۰ ماشومانو ته واکسین ورکړل شي.
د پکتیکا ولایت روغتیايي مسوولین وايي، له کومې ستونزې پرته یې د دغه ولایت په ټولو ولسوالیو کې له پنځو کلونو کم عمره ماشومانو ته د پولیو واکسین درې ورځنۍ کمپاین پیل کړی.
په همدې حال کې بیا یوې ځايي سرچینې د نوم نه ښودلو په شرط اطلاعات روز ورځپاڼې ته وویل، چې د پکتیکا ولایت په هغو ولسوالیو کې هم د طالبانو د روغتیا ریاست له لوري د یاد واکسین ورکړه پیل شوې، چې پخوا به په کې حرام بلل کېده او روغتیا پالانو ته یې اجازه نه ورکوله، چې ماشومانو ته واکسین ورکړي.
هغه وویل: «زمونږ په تروې، وازیخوا او ځینو نورو ولسوالیو کې واکسیناتورانو ته اجازه نه وه، چې هلته دوی د طالبانو له وېرې ماشومانو ته واکسین ورکړی وی، ځکه هلته خلکو ته ویل شوي و، چې دا واکسین حرام دی او خپلو ماشومانو ته یې مه ورکوئ.»
د یادونې وړ ده، چې په تېرو کلونو کې پکتیکا د هیواد له هغو ولایتونو و، کوم چې په کې د پولیو دوه پېښې ثبت شوې وې او د طالبانو د روغتیا وزارت د مالوماتو له مخې په ټول هیواد کې نږدې ۱۰ میلیونه ماشومانو ته د پولیو یا ګوزڼ ضد واکسین ورکول کیږي.
