ننګرهار کې کروندګر وایي، چې د اصلاح شویو تخمونو نشتون، د کیمیاوي سرې د بیو لوړیدل، باکیفیته زراعتي درملو ته نه لاسرسی او د حاصلاتو لپاره د بازار نشتوالی هغه ستونزې دي، چې له امله یې ددوی حاصلات کمزوري او بې ګټې کړي دي.
د دغه ولایت د کامې ولسوالۍ یو بزګر شاه ولي اطلاعات روز ورځپاڼې سره په خبرو کې پر مسوولو ادارو نیوکه کوي، چې دوی ته پر وخت د کرنې ریاست او نورو مرستندویه ادارو له لوري اصلاح شوي تخمونه او کیمیاوي سرې نه ورکول کیږي.
شاه ولي زیاتوي: «مونږ له کرنې ریاست غواړو چې اصلاح شوي تخمونه او سرې دې د فصل کرلو په وخت دهقانانو ته ورکړي، ډیر کله د غنمو او یا نورو فصلونو وخت تیر وي بیا له دهقان سره د اصلاح شوي تخمونو مرسته کوي.»
د بهسودو ولسوالۍ یو کروندګر ګلاب شیر اطلاعات روز وځپاڼې ته وویل، که د کرنې ریاست یې د حاصلاتو لپاره سړې خونې، د غنمو زېرمې، د بسته بندۍ مرکزونه او بهرنیو بازارونو ته د لاسرسي په برخه کې لاسنیوی وکړي حاصلات به یې زیات او د بازار اړتیاوې به پوره کړي.
ګلاب شیر زیاتوي: «که چیرې حکومت د بزګرانو لاسنیوی وکړي د اصلاح شویو تخمونو برخه کې او همدارنګه د کیمیاوي سرو په برخه او ترڅنګ یې د حاصلاتو لپاره سړې خونې جوړې او کرنیزو تولیداتو ته یې بازار موندنه وکړي، نو تر ډیره به کورنی اقتصاد پیاوړی شي او هم به دهقانان د بازار اړتیاوې پوره کړي.»
بل لور ته ننګرهار کې د طالبانو د کرنې رییس مولوي عبدالستار اطلاعات روز ورځپاڼې ته وویل، دوی بزګرانو ته په بېلابیلو سیمو کې څه باندې اته زره ميټریک ټنه اصلاح شوي تخمونو ورکړې او زیاتوي، حکومت ژمن دی چې د کرنې تر څنګ د صنعت د ودې لپاره هم د خصوصي سکټور سره مرسته او ګډ کار وکړي.
مولوي عبدالستار زیاتوي:« د ننګرهار د کرنې ریاست ۸ زره میټریک ټنه اصلاح شوي تخمونه پر دهقانانو ویشلي او همدارنګه په همدومره اندازه یې کیمیاوي سرې هم بزګرانو ته ورکړي».
د کرنیزو چارو پوهان وایي، حکومت ته په کار ده، چې د کرنې برخه عصري او د هېواد کروندګرو ته کاري زمینه برابره کړي چې هېواد د کورنیو تولیداتو په برخه کې په ځان بسیا شي.
