اطلاعات روز: د ننګرهار مرکز جلال اباد ښار کې یوه کورنۍ ادعا کوي، چې تیره شپه یې طالب ځواکونو یو ماشوم په ډزو وژلی او دوه نور یې ټپیان کړي دي.
د انجینر صلاح الدین په نامه د یادې کورنۍ یو غړي نن (یک شنبه، ۴ د غویي) اطلاعات روز ورځپاڼې ته وویل، دا پېښه تېره شپه د جلال اباد ښار اومې ناحیې اړوند زېړانو سیمه کې هغه مهال رامنځته شوې، چې د عادل په نامه یاد ماشوم، چې شاوخوا ۱۵ کاله عمر لري د شپې ناوخته له خپل دوکان څخه د کورنۍ دوه نورو غړو سره یو ځای خپل کور پر لور روان وو.
نوموړي زیاتوي وژل شوی ماشوم او دوه تنه نور په ریکشه کې سپاره و، چې د طالبانو په تلاشۍ یې د وسله والو غلو ګمان کړی د ویرې له کبله ورته نه دي درېدلي چې مقابل کې امنیتي منسوبینو له لوري پرې ډزې شوي، چې پرمهال یې عادل وژل شوی او دوه تنه نور برسېرن ژوبل شوي.
نوموړي وایي، دغه موضوع يې پر خپل وخت له امنيتي ادارو سره شريکه کړې او هغوئ پدې برخه کې د قانون پلي کولو ډاډ ورکړى دى.
اخوا ننګرهار کې د طالبانو د امنیه قومندانۍ امنيت امر ظاهر مبارزه اطلاعات روز ورځپاڼې ته یاده پېښه تائید کړه او ویې ویل، چې د وژل شوي کس کورنۍ امنیتي ځواکونه تورنوي، مګر سرتېري وایي چې یاد کس د وسله والو غلو په ډزو کې وژل شوی.ل
مبارز زیاتوي د یادې پېښې په تور یې څلور طالب سرتیري نیولي او د پېښې په اړه یې ترې څېړنې پيل کړې تر څو جوته شي چې اصلي کيسه څه ده.
یوه میاشت وړاندې د ختیځ زون کونړ ولایت کې هم طالبانو یو ځوان په دې بهانه وژلی و، چې ګوندې د دوی تالاشۍ ته نه و دریدلی.
