لوی کندهار کې د اطلاعات روز خبریال
اطلاعات روز: ارزګان ولایت کې کسب ګرې ښځې وایي، د پخواني حکومت تر ړنګیدو وروسته یې کارونه په ټپه ولاړ دي، په لاس جوړ کړي توکي یې څوک نه اخلي، طالبان دې ورته بازار پیدا کړي.
رازیه چې پخوا یې د خپلو دوه لورګانو سره په ګډه ارزکان مرکز ترینکوټ کې د لاسي صنایعو کار کوه او دخپلې کورنۍ اقتصادي اړتیاوې یې پوره کولې وایي، تر سیاسي بدلون وروسته یې کارونه په ټپه دریدلي او د خپل لاس تولید شوي صنایع یې پر کور پاتې دي.
هغه وايي په تيرو وختونو کې به يې له همدي لارې روزې ګټله خو، اوس کار نشته او له اقتصادي ستونزو سره مخ ده.
دې وويل:« زه او زما لورګانو به په تيرو وختونو کې دغه لاسي غاړې او ګنډونه جوړول بیا به مو په ښار کې پلورل خوکله چې سياسي بدلون راغلی دی زموږ دغه لاسي توليد ټول پر کور پاتې دي، د خلکو اقتصاد کمزوری دی موږ هم ويره لرو، ښار ته نه ځو د طالبانو غوښتنه کوو چې زموږ سره دی د کار په پیداکولو او نورو برخو کې مرسته وکړي.»
دا يوازي رازيه نه ده چې د خپل لاس توليد شوي توکي يې بازار نه لري، د ارزګان ولايت په مرکز ترينکوټ کې يو شمير نورې ميرمنې هم له ورته ستونزو سره مخ دي.
شاه فرو او مريم بي بي دوې نورې ميرمنې دي چې د طالبانو له حکومت څخه کاري فرصتونو د پیداکيدو غوښتنه کوي.
هغه وايي:« موږ په کور کې د سهار ماښام ډوډۍ نه لرو څه وکړو که موږ ته کار پیداشي موږ د هيچا مرستې ته اړتيا نه لرو باید موږ ښځو ته دولت يو کار پیداکړي ترڅو موږ چاته لاس ونه نیسو.»
ورته مهال د ارزګان طالب مسوولین د میرمنو ستونزې مني او وایې، چې پدې لټه کې دي چې د دوی ستونزې هوارې کړي.
ارزګان ولايت د طالبانو د اطلاعات او فرهنګ ریس ملامحمد اصف وايي، د برګ په نوم یوې موسېسې سره ږغیدلي دی او هغوئ يې هڅولي چې سوداګرو ښځو په لاسنيوي برخه کې مرسته وکړي.
نوموړی وايي دوی ددغه ډول ښځو ملاتړ کوي او د برګ په نوم دغه موسېسه به د نورو برخو ترڅنګ د ښځو سره د چرګانوفارمونو د شيدوغواګانو، کاليو او ماشومانو برخه کې مرسته وکړي.
اصف وويل:« موږ د ټول سوداګرو ښځو ملاتړ کوو والي د برګ په نوم یوي موسېسي سره په ليدنه کې دبي سرپرسته ښځو ستونزې شریکې کړي د برګ موسېسه چې په ۹ بېلابېلو برخو کې کار کوي د ښځو سره به هم د اقتصادي ستونزو حل کولو کې مرسته وکړي.»
په ورته وخت کې د اقتصادي چارو کارپوهان وايي د طالبانو لخوا پر ښځو محدوديتونه ددې لامل شوې دي چې ډيرې ميرمني د طالبانو څخه د ويرې له امله په ښار کې د کار کولو څخه لاس واخلي.
يو تن د اقتصادي چارو کارپوه جليل جليلي په دې اړه د اطلاعات روز سره په خبرو کې د طالبانو څخه غوښتنه وکړه چې ښځو ته د فقر کولو د اجازي پر ځای دې د زده کړو او کار کولو برخه کې اجازه ورکړي.
نوموړی وايي:« ډيرې هغه ميرمني چې پخوا به يې کار کوه د طالبانو د راتګ وروسته يې اوس کار کولو ته زړه نه ښه کوي طالبانو ته په کار ده چې دغه ښځې کار کولو ته وهڅوي ددي پر ځاي چې ښځې په ښار کې فقر وکړي تر هغه دا ښه ده چې ښځې زده کړې او کار وکړي.»
ارزګان یو له هغو ولایتونو څخه دی چې کلتوري محدودیتونه پکې زیات دي او له همدې له امله زیاتره نجونې د زده کړو څخه بې برخې دي.
په ارزګان کې د تيرو جګړو له امله د ګڼو کورنيو سرپرستان وژل شوي دامهال يې ميرمني د خپلې کورنۍ سرپرستي کوي او له همدي لارې روزي په لاس راوړي.
